نظرات

ما سأكتبه لا اقصد فيه شخصا بعينه..ولم اكتبه وبداخلي ضغينة تجاه احد..لكنه يشتمل على وقائع..
ولو غفلت ان اذكر شيئا فتذكر ان من يكتب ليس باسامة منير..واذا لم يعجبك شيئا مما كتبته فلا يهمني رأيك بقدر اسفي على حالك لعدم فهمك ما يحدث من حولك..

سأتحدث معك باستفاضة عما يحدث لك كشاب جامعي..

وانت جالس امام كُليّتك تنظر حولك فتجد عدد كبير من الفتيات لا باس به.تجد من بينهن من تنظر اليك-لو ربنا كرمك واستحميت ولبست حلو-فتتساءل وتتعجب هل هذه الفتاة تنظر الي لانها معجبة بي؟ لو حتى هذا صحيح فان تواضعك وعدم غرورك سيمنعك من
قول امر كهذا،ام انك مغرور؟

لو كنت مغرورا فانا اعرف شخصا مغرورا.عندما تنظر اليه اي فتاة يقول: انها تنظر لي انها معجبة بي ،حتى فتاتك اذا نظرت اليه دون قصد منها ،يحسبها تنظر اليه اعجابا به فيقول في عقل باله:"يا ولد دا حتى البنت بتاعت صاحبي بتبصلي دا انا براد بيت بقى ومدوخ البنات ورايا يا سلام عليا"..

تعجب-انت-بفتاة فتنظر اليها،فيقوم-المغرور-بالنظر

اليها ايضا..-طب بتبص عليها يا معفن وانت مال اهلك بيها-..فتجد الفتاة شابان ينظران اليها..فتنظر هي بدورها اليهما وتقول لنفسها:"هو مين فيهم بالظبط اللي عايز يكلمني"..فتبصلكم وتضحكلكم-عشان شافتكو هبل-..وتشتغل اغنية فاتت جمبنا..بعد فترة ياتي ويسالك-المغرور-:"هو انت لسة عايز تكلمها ولا فكست خلاص؟..اصل انا برضو من ساعت مشوفتها وهي عجباني وعايز اكلمها فانا بسالك عشان متزعلش مني لو حصل وكلمتها..اصلها بتبصلي برضو"..شكله كان سامع اغنية ابدأ احنّلها قبل مايكلمك..وياله له من شخص اخرق وساذج و لايؤتمن على شيء..شكلك كدة غير مخلص..هل انت غير مخلص؟

اذا كنت كذلك فانا اعرف شابا عندما تمر صديقة حبيبته-المفروض انها حبيبته-ينظر الى جسدها-من غير طبعا البت ماتاخد بالها- ويتحدث عن جسدها مع اصدقائه..طب يبني لما البت بتاعتك مش مالية عينك بتوهمها ليه انك بتحبها..طب عايز تبص بص على واحدة تانية واتكلم عليها لكن محبكتش صاحبة حبيبتك..بس عادي هو مش في دماغه حاجة لانه كدة كدة بيتسلى ..وهياخد اللي هو عايزه وبعدين يرميها..واكيد بيتكلم على جسمها هي نفسها معاهم....وهي مفكرة انه بيحبها ومخلص ليها..وفرحانة بمسك ايديها والتحسيس على كتفها وظهرها..وهي برضو زيه هتقضيها واول عريس هيتقدملها معاه عربية وفلوس هتقوم موافقة عليه على طول وطظ في الحيوان اللي بيحبها..هي عاشت اللحظة وعملت اللي في نفسها..

فلنتحدث عن نظرات الفتيات..ساضع لك العنوان ثم احكي لك ما يحدث..

*(روحي يا معقدة لدكتور نفساني)
ساحكي لك شيئا عندما سمعته ضرب كفا على كف..صديقة لي اخبرتي عن فتاة انه اذا جاء شاب يتحدث اليها ويريد ان يرتبط بها،لكن هي لا تطيقه..هتقفله..وبعد كدة كلما تراه تستمر في النظر اليه مع ابتسامة حتي يأتي اليها مرة اخرى فتقفله تاني..

*(امشي يا مجنونة من هنا)
شاب جالس مع اصدقائه في الكلية..ينظر من حوله فيجد احدى الفتيات تنظر اليه بتركيز شديد وتتابعه في كل شيء يفعله..تجاهل الامر لكنه لاحظ تكراره يوميا..فطلب من صديقه الذي على علاقة بصديقة الفتاة ان يعرف ايه النظام..وجاء الرد..كان تنظر اليه هكذا من باب الفضول لا اكثر ولا اقل..

*(نعم!!!انتي عايزة ايه ياحاجة؟!!!متروشنيش يا بت انتي)
تجد فتاة تنظر اليك وتتابعك..لكنها نظرات عادية جدا لا تحمل فضول او اعجاب او حب وليس هناك اي شيء يدور في عقلها..فقط تنظر..

*(انتي بتشتغليني؟!!!)
شاب يجد فتاة اعجبته فيتحدث اليها..فيجدها تفتح معه حوارات وتاخد وتدي معاه في الكلام..يجدها تحاول ان تتواجد حول منطقة جلوسه..عندما يتحدث معها ويهم بالنصراف يجدها تفتح موضوعا اخر..يجلس في الاتوبيس فتجلس في المقعد الذي امامه..لسة هيقولها ازيك وهيكلمها يجدها تلتفت بسرعة عندما تلمحه بطرف عينيها ثم تتحدث..بعد فترة يأتي شاب ويتحدث اليه ويقول:"انت تعرف بت اسمها كذا؟..اه بتسأل ليه؟..طب هي تلزمك في حاجة؟ اصل انا بكلمها وتلزمني"..يكتشف الشاب-بتاع الاتوبيس- ان هذه الفتاة مرتبطة بالشاب-بتاع تلزمك في حاجة-وبتحكي له انها بتكلم فلان الفلاني وبتاخد منه ورق وكدة..

*(الحقد والغيرة)
فتاة مرتبطة بشاب وسيم او دمه خفيف او معاه عربية او اي حاجة بقى..-مش موضوعنا ده-..ياتي حبيبها فتذهب اليه وتترك صديقتها..-تعالى كدة معايا يا عزيزي نقف بعيد ونشوف ايه اللي بيحصل-..تجد صديقتها قاعدة بتغلي وهتفرقع وعمالة تبص للواد..وتقول في عقل بالها:"اشمعنا كلمها هي ومكلمنيش انا؟..هي احسن مني في ايه؟"..يذهب الحبيب وتاتي الفتاة وتحكي لصديقتها كانو بيقولو ايه..تقوم صديقتها لاعبة في دماغها قال يعني خايفة على مصلحتها.."انتي بعد كدة متعمليش كذا كذا..اه عشان ميفتكرش انك مدلوقة عليه..يقولك يمين قوليله لأ شمال..متسمعيش كلامه..انا بقولك كدة لمصلحتك..اديلو على دماغ امه"..-وامه ملهاش ذنب في الموضوع-..

*(اتفو عليكي بت تييييت)
شلة بنات واحدة فيهم عايزة تتسلى وتضحك شوية..يتفقوا مع بعض وتختار واحد طيب اهبل مالوش في اي حاجة خالص..وتستمر في النظر اليه لحد ما يقع ويجلها..تبتدي تحسسه انها معجبة به فياخد الواد الخطوة التانية ويبدأ في النحنحة..بعد ما يمشي تروح تسخر منه مع صديقاتها.."ها قالك ايه؟..قالي كذا كذا شوفتو الاهبل..ههههههههههه..وبعدين؟..كذا كذا ويقولي انتي كذا وانتي الحتة اللي كذا ومعرفش ايه..ههههههههه..دا عبيط..هههههه"..اصبح البلياتشو الذي يُضحِكهُن..

*(الكرامة والتناكة،والبقاء لذي النفس الاطول)
شاب اعجبته فتاة فيذهب ويتحدث اليها ويخبرها انه معجب بها..فتقفله وتنفضله..ولكنها تنظر اليه وتتابعه..والشاب عاجبها وكل حاجة تمام..بس مينفعش تكلمه عشان منظرها ادام صاحباتها..مينفعش تبان ضعيفة وبتقع بسهولة ادامهم..لازم تبقى جامدة..ومنها برضو ترسم نفسها.. وبكدة ضربت عصفورين بحجر..وتشتغل اغنية انا مش بتاعت الكلام ده انا كنت طول عمري جامدة.."هو عايز يجي يكلمني اكلمه كدة على طول..لأ لازم يعرف اني مش سهلة..عيب على كرامتي ومنظري وتناكتي..هطلع عينه وخليه يجري ورايا شوية"..الحق نفسك وبطل سجاير عشان لما تيجي تجري وراها متتعبش..

*(انتي بتبصي فين؟!!انا مُز اه.. بس راجل اوي)
وانت واقف عادي جدا..تلتفت وراءك فتجد فتاة تنظر على جسدك بجميع تضاريسه..كأنها الرجل وانت الفتاة..شكلك كدا واد مُز..وفيه شباب بتفرح بالموضوع ده وتتعمد انهم يمروا من بين الفتيات..

*(المعاكسة او الشهوة)
فتاة تنظر اليك لتتكرم سيادتك لتذهب وتتحدث اليها..-نفسها تحب وتتحب وتتعاكس وتحس بانوثتها-..تلاقي بقى نحنحة وكلام حلو وكل اللي انت عايزه..وطبعا لو انت واد خبرة كلنا عارفين انت هتعمل ايه..

*(انتي بتعملي ايه؟!!!انا مليش في الحك)
تقف في المعمل او في المشرحة..البت تبصلك..وبعدين تلاقيها جاية تلزق فيك..تلاقيها وقفت امامك ملاصقة لك وقامت موطّية..تقف وراك تسند عليك..تحط راسها على ظهرك..تحط ايديها على ظهرك..وهي ماشية تقوم مستعبطة وضاربة البالطو فيك..عندما تمر بجانبها لا تفسح لك الطريق..تكتفي بعوجة بسيطة في كتفها..

*(السخرية)
جالس في حالك..فتنظر حولك..فتجد بنات بيشاوروا عليك وبيبصولك وميتين على نفسهم من الضحك..ربنا يشفيهم اظاهر مبصوش على نفسهم في المراية..

*(جذب الانتباه)
وهناك فتيات تنظر اليك فقط حتى تلفت نظرك اليها-امال هي لبسة محزق وضاربة الوان في وشها وفي الاخر انت متبصش عليها دا انت اعمى بقى-..ولست اعمم قولي..وتبدأ-انت-النظر في وجهها و على جسدها .وتقول:"ايوة كدة يا وديع..اففف..يخربيتك دا انتي جامدة"..وتلاقيها كل متعدي من امام شلة شباب..كله بنسى هو كان بيعمل ايه ويبص على حاجة تانية والكل مريل على هدومه...

*(عريس يا ماما)
شاب يعجب بفتاة فيذهب ويتحدث اليها..الواد في كلامه كان باين انه مدلوق عليها..وشكله وطريقة كلامه بيقولو انه ملوش في البنات اوي..تخبره الفتاة انها ليست مرتبطة ولا تريد الارتباط وانها لا تفكر في هذه الامور..كلمتين حافظاهم اي بنت..وبعدين البنت تفضل تبصلوا وتثبتوا بالنظرات والحركات عشان تحسسه انه في دماغها..شافت الواد هيموت عليها..فبترسم نفسها وبتمثل عليه دور الخضرة الشريفة.."دا بيحبني وهيموت عليا ومش هيقدر يستغنى عني..خلاص بقى كدة كدة هو بيحبني فمش هيسبني..هو دا خطيبي..انا هشوف حالي مع اي واحد تاني يهزر معايا ويدلعني ويظبطني وخلي اللي بيحبني استبن..ولو الحوار فشل مع الواد التاني اهو الاستبن موجود..هقله يخلي ارتباطنا رسمي وعيش عليه دور المحترمة عشان يقولي هاجي اخطبك"..بتثبت الواد وعملاه استبن..الشباب بقوا زي الكاوتش والبنات زي العربيات..كاوتش فرقع مش مشكلة الاستبن موجود..


صدق او لا تصدق!

انا لن اكذب عليك فانا كل ما فعلته في الكلية هو الجلوس على سلالمها..ادخن السجائر واتابع الفتيات..ومع ذلك فانا نادرا ما انظر الى جسد فتاة معي في الكلية او خارجها..وعندما انظر فليس هناك اي نظرة مني تحمل شيئا من السخونة اوالشهوة،كأني انظر الى صديقي،هل انا صرت بارداً ام ماذا؟!!!!!!

اجابة السؤال لا تعنيك..

هذه هي الحقيقة يا عزيزي بكل مساوئها..

قلت وأقول وسأقول دوما:"ضاع الحب في زمان ساد فيه التفريش!"...

الاغبياء السذج

ان تهتم بشخص لا يستحق الاهتمام،،ان تحب شخص لا يستحق الحب،،ان تفكر في شخص لا يستحق ان تفكر فيه،،ان تكون صديقا لشخص لا يستحق الصداقة،،ان تتحدث مع شخص لا يستحق المحادثة او حتى مجرد الانتباه اليه،،كل هذا مضيعة للوقت وجريمة في حق نفسك،وهذا ما يفعله الاغبياء السذج...